HATA PATUJOLO

HATA PATUJOLO

Pinuji ma Debata namangalehon tingki dope naeng patolhashon barita taringot Tuan Juara Bulan nasasintongna ima marhite tona dohot adat naung diulahon marsundut-sundut. Ala namangingot do dihata:

Ompu Raja di jolo martungkot sialagundi

Napinungka ni naparjolo ihuthonon ni naparpudi

Tung maju pe parngoluon, lam tu moderenna ma nian pambahenan dohot parniulaon di sude pinungka ni Ompu Raja Najolo, Alana ndang tarpasiding pengaruh ni lingkungan dohot angka hamajuon ni parbinotoan ilmu dohot teknologi. Nang pe adong perubahan na binoan ni angka na ro tu bonapasogit, suang songon i nialaman ni angka pangaranto di luat na asing, alai tung anggo tona dohot padan ni Ompu i tung na so jadi muba do. Alana tung i nama hinauli ni sioloi tona dohot padan songon ni dok ni Ompu Parjolo:

Bongbong parpadanan disuan Ompu Parsadaan

Sipagabe na niula, si pasinur pinahan.

Sulum ni gonggoman porngis na lumunta-lunta

Molo tingkos uhum jinongjongan, hipas ma hita saluhutna.

Jala tarida do nang pe muba angka uhum alai anggo padan tung i nama toguna ingkon siingoton.

Togu urat ni bulu, togu an urat ni padang.

Togu hata ni uhum, toguan hata ni padan

Padan na so boi oseon. Bulan na so jadi ubaon.

Ranting ni bulu duri hasonggopan ni si ruba-ruba

Padan na so ra mose do i uhum na so ra muba.

Marnida jaman globalisasi saonari on tung godang do perubahan, jala tung biar do roha molo adong pangulaon di adat dohot dipangalaho ni Pomparan ni Ompu…tu Pomparan ni Ompunta Tuan Juara Bulan i ma anak si pai dua ni Suri Raja. Asa tingkos parhundul, panjouon dohot angka lan na asing dope tu Pomparan ni ni Ompunta Tuan Juara Bulan denggan do botoonta hatorangan na sasintongna. Asa unang ma hita terpengaruh tu angka buku naasing naadong hea dibahen angka na so horong pomparan ni Tuan Juara Bulan. Alana godang do i dipengaruhi angka panjaja na jolo nanaeng mamola-mola angka nasauduran asa mura jajaonna.

Harap situtu do marguna buku on asa adong pedoman di hita namarhaha-maranggi jala tetap sada margoar Pomparan ni Tuan Tuan Juara Bulan. Jala binahen do salinan ni tarombo napatuduhon pomparan ni Ompu i.

Jala tung dipaima roha do asa nahurang dibagasan boi disusulhon Alana sumber ni data on nunga tung adong manang tolu pulu taon jala ndang hea dope disensus ulang.

Mauliate Jumolo pinasahat tu angka dongan namangalehon tingki pature-turehon dohot padengganhon redaksi ni buku on. Jala tarbuka dope hami sian angka kritik membangun asa haru lam tudengganna maksud dohot tujuan ni buku on.

Pematang Siantar, Maret 1996.

Namanghobasi,

Ompu Ibrahimsyah Simbolon.

HATA HUHUASI SIAN PENTERJEMAH

Dohot hormat dohot toru ni roha jumolo hami mangido maaf Alana nunga sataon buku on dihobasi Amanta Ompu Ibrahimsyah Simbolon baru pe niterjemahon tu bagasan hata Nasional (Indonesia) ala ni godang ni sipadirion laho mangulahon penerjemahon on.

Penerjemahon hata daerah tu hata Nasional marsangkap do asa turunan penerus dohot angka pangaranto naung leleng maninggalhon bona pasogit jala nahurang mangantusi bahasa daerah boi mangantusi isi nio buku on. Susunan kata-kata bahasa daerah dibahen sedekat mungkin dohot bahasa Nasional, asa boi diantusi dohot logat has daerah. Molo terjemahan na dipalaambok (to the point songon penerjemahan umpasa, pantun manang parumpamaan) jadi hata-hatana ndang dapot pasti diantusi jadi terpaksa ma diartihon dohot hata siganup ari.

Di tingki naasing sesuai tu haporluanna ingkon dipaimbaru manang ditambai tu bagas manang piga bahasa, Alana mungkin adong do pomparan ni Ompu Tuan juara Bulan namangaranto tu Luat naasing jadi hurang mangantusi hata batak Toba. Usul sian namanjaha buku on tung mansai porlu jala niharaphon do laho padengganhon buku terjemahan on. Pinasahat ma jumolo maaf dohot hata mauliate godang tu Pomparan ni Ompu Tuan Juara Bulan dohot tu sude na mangurupi penerbitan buku on.

Jakarta, tanggal 7 Maret 1997,

Ir. Sihol Binsan Marasi Simbolon (Aman Sunarta)

Jln Raden Fatah No 2, RT 001/RW 010, Sudimara Selatan, Ciledug, Tangerang 151251, Telp 021 7307825