Sejarah Simbolon

I. PARTORDING NI PARHUNDULAN NI TUAN JUARA BULAN DI POMPARAN NI OMPU JANABOLON (SIBOLON TUA)

a. Ringkot ni parhundul di ulaon adat.

Songon angka naung nitonahon (dituriturihon) ni Ompu Naparjolo na turun-temurun tu angka pinomparna, mansai ringkot do botoon partording ni partuturon di namarhaha-maranggi, mardongan sabutuha dohot namarhula, marboru. Molo masa paradaton di halak hita BATAK ingkon diboto do tangkas partording ni parhundul, alana hombar tu parhundul do binoto parhaha-marnggion urutanna, hula-hula dohot boru; molo dung tingkos parhundul Leang Nagurastaa renta ma jala unur-unur ma sude siulaon i. ido alana ingkon tingkos botoon parhundul niba di namarhaha-maranggi.

Jala taringot tu parhundul ni Ompu Tuan Juara Bulan di namarhaha-maranggi sian Pomparan ni Ompu Janabolon.

binoto taringot tu barita ni Ompu Suri Raja nanaeng sipaboaon di Bindu 2; alai asa pintor dapot pangarimpunanna (garis besarna), ido umbahen jumolo parhundul ni parhaha-maranggion parjolo tinaringotan.

b. Parsaripeon ni Ompu Suri Raja.

Ia Ompu Raja Nabolon (Sibolon Tua = Janabolon) dua ma Anakna ima:

1. Suri Raja

2. Martua Raja

Ia Ompunta Suri Raja tolu do parsonduk bolonna (dongan saripena = nanialapna = pardijabuna ima:

1. Maria Rudang Bako

2. Leang Nagurasta (Boru ni Mulajadi Nabolon)

3. Boru Manurung.

Jadi dialap Suri Raja pe Leang Nagurasta sada do tubuna anak baoa ima Tuan Juara Bulan.

Martuahon imbang ma Maria Rudang Bako sorang ma Nahoda (Tuan Nahoda Raja). Alai sai jamot do Ompu Leang Nagurasta di angka adat marimbang sai ringkot situtu ingkon dos bahenon ni Suri Raja di nasida nadua parsonduk bolonna. Dungi dapot ma di ari nauli nadenggan, rap tubu-tubuan ma nasida, sian Maria Rudang Bako ima sada anak baoa ima Tuan Nahoda Raja; jala sian si Leang nagurasta sada anak borua ima Marhite Ombun (nasohot tu Marga Malau). Laho ma muse Suri Raja tu Habinsaran dioli ma boru Manurung.

Ia sian boru Manurung adong do dua anak ima Pande dohot Altong songon naboi jahaon di Bindu 2. Jadi songon partording ni parhaha-maranggiaon tarsongonon ma:

Gambar 1. Partording ni Parhahamaranggion di Simbolon

Jadi pitu ma panggoari ni Simbolon sian dua ama songon natarsurat di Gambar 1. Jadi sian na dua ama anggo naparjolo tubu ima Tuan Juara Bulan jala sian ina paduahon nialap ni Suri Raja

2.BARITA NI SURI RAJA NA MANGALAP LEANG NAGURASTA.

a. Hinadenggan ni Suri Raja rap dohot Maria Rudang Bako.

Songon na taboto di Bindu 1, ia Suri Raja parjolo mangoli Maria Rudang Bako alai tung leleng do hol ndang tubuan anak (leleng asa marrindang). Ulaon ni Maria Rudang Bako martonun ulos siganup ari. Jala Ompu Suri Raja ulaonna marultop-ultop do tu dolok Pusuk Buhit.

Di sada tingki dos ma roha ni Ompu Suri Raja dohot Maria Rudang Bako asa mangalap boru (mangoli) Ompu Suri Raja anggiat asi roha ni Mulajadi Nabolon dapotan anak dohot boru, gabe boi martuahon imbang.

Dinalaho Suri Raja marultop-ultop tu Dolok Pusuk Buhit, borhat ma ibana dipaborhat Maria Rudang Bako. Di Batu Gaja (Batu Hoda) dibereng ma disi adong anduhur bombon, diultop ibana ma alai sipi ndang Mate, boi dope habang-habang boi leleon jonok-jonok. Jadi sai diadu-adu Suri Raja ma, lam nangkok tu dolok, ianggo di bagas rohana ingkon dapotsa do, jadi didok ma dibagas rohana, ingkon adong gantina molo so dapot.

Oh anduhur bombon, haru patibu mate tarpodom asa dapot jomahonku boanongku tu jabungku. Molo so dapothu gantina sai dapotongku ma pardijabu.

Jadi sai dipadu-adu ma gabe sahat ma ibana tu punsu ni Dolok Pusuk Buhit ndang dapotsa anduhur bombon i. Nunga tung loja Suri Raja manjalahi alai tung so jumpang naniluluanna, jadi maradian ma ibana di si jala huhut sai marangan-angan naeng mangalap boru muse.

b.Suri Raja Pajumpa dohot boru ni Mulajadi Nabolon.

ia di punsu ni Dolok Pusuk Buhit i adong do tardingkan toru saotik dibagian sabola utara sada….ambar songon tao namet-met (sahat tu sadari on adong dope ambar inon). Jala dingkan toru ni ambar inon adong do harang-harangan (hutan kecil) jala di toru harangan on mata ni aek rangat ipe asa Tao Toba dohot Sagala. Manaili ma Suri Raja humaliang ala tarbegesa suara ni na marende-ende marlas ni roha suara ni angka anak boru, tarbereng ibana na di ambar inon pitu anak boru nauli situtu marende-ende huhut marlange-lange, marembas-embas dibahen patna (simanjojakna) di tingki namaridi i. Sian napitu anak boru nauli inon adong sada na tandi hinaulina, ro di parpeak ni paheanna pe tandi do. Ndang dihilala ibana be lojana dohot malena nunga hira nalobian butong mangan ibana holan mambege endena dohot marnida uli ni rupa ni anak boru inon. ido umbahen nadidokhon:

Madekdek ma gambiri, ba sai madekdek tubonana.

Molo hubege soara na ba lobian na butong mangan.

Tubu ma dibagas roha ni Suri Raja laho manirimi baju habong-habong ni nasinolo ni rohana i ima nasada natandi sian napitu inon, hape boru ni Ompu Mulajadi Nabolon do nasida na pitu anak boru inon. Dapot Suri Raja do baju habong-habong i, sai marlojong ma ibana mulak huhut las rohana, alai hira-hira satonga dalan dung dapot Pea Bang, parsitongaan ni Pangururan dohot Pusuk Buhit mandapothon hutana tarbege ibana ma soara nalambok jou-jou sian pudina, mansai tabo begeon jala manorusi roha ni Suri Raja. Hape soara ni nampuna baju habong inon do namanjou manggora sian pudina nina ma: “Painte jolo amang paulak bajungki, ai nungga habang be donganhu naonom inon holan ahu nama tinggal. Asi roham di ahu”, ninna.

Jala manaili ma Suri Raja tu pudi jadi dibereng ibana ma hinauli ni anak boru i, jala hira namarsinondang, tarhatotong ma ibana, gabe diboto marroha gabe siotoon, gabe hira na napajok ma ibana hira tungko-tungko, gabe soada roha, habang tondina. Dibuat si Leang Nagurasta ma bajuna i, dipangke ma, habang ma ibana mandapothon donganna na onom inon, naung parjolo mulak tu ginjang.

Nunga mulai holom ari, mangombus alogo, huhut ngali ari, ro rimbus-rimbus. Marlobok taroktok ni Maria Rudang Bako, dibereng ma bulu parhalaan, boa-boa nunga adong parmaraan di tongan dalan. Humalaput ma ibana diboan ma lili tunggal dohot demban na saur, dung sahat tu inganan i mardemban ma Maria Rudang Bako. Toho ma tutu nunga tarberengsa di si Suri raja songon tungko (patung) ndang marroha nunga mago tondina. Dipangido Maria Rudang Bako ma huhut ditonggo ma tu Mulajadi Nabolon asa mulak tarjolma Suri Raja, dibursik ma dohot napuranna jala dilinsing dohot lili tunggal; dilehon do pangidoannai, gabe tarjolma ma Suri Raja songon nasomal, dungi rap mulak ma nasida nadua tu huta. Saleleng di pardalanan laho mulak tu huta marsiadu sip do nasida marhusari di bagasan rohana be.

c. Pangoloion ni Maria Rudang Bako di sangkap ni Suri Raja

Dung sahat tu huta marsungkun ma Maria Rudang Bako tu Suri Raja: “ Dia do siala umbahen na ro mara tu ho Suri Raja?” ninna, dungi dialusi ma dohot denggan tu Maria Rudang Bako nasasintongna taringot tu boru si Leang Nagurasta, namambuat mulak bajuna sian Suri Raja. Gabe dialusi Maria Rudang Bako ma songon on: “ia ale amang, molo sai ingkon ido ditodo roham ima si Leang nagurasta ima boru ni Mulajadi Nabolon; hupaborhat pe ho alai ulahon ma nahudok tu ho”:

1. Patibu ma laho tu inganan paridianna i, ai napangului do ibana (nasida) marembas-embas maridi tusi (ambar i).

2. Angkali ma ai nunga diboto ho tong do maraturan parpeak ni baju habong-habong na be. Jonok tu hapeahan ni bajuna naeng sibuaton mi, hurak tano i siat hundulan alai unang tarida tano panghurahan i, dao bolongkon, hundul ma ho di lubang i painte ro maridi nasida na pitu. Bahen duhut-duhut (bulung-bulung) narata unang tarbereng nasida ho. Disi laho masuk nasida tu ambar i pintor buat ma baju-bajuna i, ai ndang berengon na ho ai ditundali do ho laho masuk tu ambar i.

3. Molo tung jou-jou sian pudi unang tailihon tupudi.

Jadi olo ma tutju Suri Raja laho mangulahon podana i, tibu ma ibana laho manogotna i dipaborhat Maria Rudang Bako. Dibahen ibana ma tutu lubang songon ni dok ni Maria Rudang Bako dung sahat tu inganan i.

Ndang sadia leleng nari dung masuk ibana tu lubang nahinurakna i, jala diampehon duhut-duhut dohot bulung-bulung na rata tu si manjujungna ro ma tutu marhabong-habong anak boru na pitu inon dibukai be ma paheanna songon na somal. Jala dung masuk tu ambar i pintor dibuat Suri Raja ma baju habong-habong ni si Leang Nagurasta; pintor hatop ma ibana marlojong mulak huhut mansai gomos di hobat baju habong-habong i asa unang malua. Ala ni las ni rohana sai songon parlojong ni ursa nabinuru ma ibana, tung mansai hatop, sai nahurang tibu sahat tu huta mandapothon Maria Rudang Bako. Sahat ma dihuta didokhon ma tu Maria Rudang Bako asa ditabunihon tu bagas singkop di bonggar ni jabu i, jala Suri Raja nunga disuru muse asa modom jala marbulusan, jala dibahen Maria Rudang Bako ma tu bohina aek ni demban (dipambursikhon ma napuran asa marguting-guting songon ubat ni namarsahit).

ia si Leang Nagurasta adong do gorak di ibana, marlobok ma taroktokna, “aha namasa nuaeng ai marlobok taroktokhu, ale hamu donganhu mulak ma hita”, ninna; sude do na onom nari mangoloi, alai disi dibereng ma ndang disi be bajuna (pahean habong-habongna i), gabe habang ma na onom halak nari, alai tinggal ma si Leang Nagurasta. Sai marlojongi ma si Leang Nagurasta huhut diingot dalan dohot bohi ni namambuat bajuna i, hira dipastihon rohana do baoa naparjolo i do tong namambuat paheanna i di rohana. Sai disungkuni do nasa halak na ni dapotna di dalan i, alai tarhatotong do mamereng ala ni ulina. Adong do mangalusi: “ Adong do ama-ama sai marlojong tu toru ni dolok on adong di haol-haol baju-baju na bontar jala songon ursa nabinuru do hatopna unung ini dan memeluk baju putihmaringkat”, ninna.

d. Burju ni Leang Nagurasta gabe dongan saripe ni Suri Raja.

Tompu naso panagaman pajumpa ma Leang Nagurasta dohot Maria Rudang Bako: “O ale inang adong tarbereng hamu mamolus sahalak baoa mamboan baju-baju habongku?”, ninna si Leang Nagurasta. Dialusi ma: “Ai holan namartonun do ahu di son eda, ai holan tu ulaonhon do rohangku; jala sada do baoa di jabu ipe marsahit do jala marbulusan, huhut ise do ho tahe?”. Ninna Maria Rudang Bako.

“Ia ahu boru ni Mulajadi Nabolon do, goarhu si Leang Nagurasta do; ai pitu hami holan ahu ma na tinggal ai nunga mulak na onom nari habang tu ginjang mulak tu inganan ni damang”, ninna si Leang Nagurasta. “Boha tahe tudia nama ahu ai nunga botari”, ninna tu Maria Rudang Bako. “Dison ma hita, pangke ma ulos on jala masuk maho tu jabu, bereng ma ibana na di bulusan i. Jala laos tolong ma ahu subahon jolo pangalompaanta, ai alang-alang dope tonunanhon”. Ninna mangalusi huhut diajari Maria Rudang Bako ma mangalompa dungi diulakhon martonun.

Alai tarbereng-bereng Leang Nagurasta ma Suri Raja. “Uli ma anakmon inang jala olo goit-goit, parengkel”, ninna. Ia parbinotoan ni Maria Rudang Bako boi do dibahen pamerengan ni jolma i nabalga gabe met-met jala namet-met i songon nabalga. Suang songon i do dibahen Suri Raja, mula-mula dibahen hira dakdanak di pamerengan ni Leang Nagurasta, lam leleng hatop do dibahen asa mulak rupana songon nasomal.

Disungkun Maria Rudang Bako ma si Leang Nagurasta: “Boha tahe olo do ho gabe tunggane boru ni Suri Raja?”. Pintor hatop dialusi: “Olo do ahu ai tudia be ahu laho”, ninna. Jadi didok Maria Rudang Bako ma:

“Tagonan do ias sian losung, saksak tu anduri; unang adong sisolsolan di pudian ni ari

“O ale Leang Nagurasta nunga songoni huroha tingkina, ia ahu nunga mardongan saripe dohot Suri Raja, alai ndang marrindang, jala hujujui ma ibana mangoli jadi dipaboa ma sude namasa (kejadian) na di dolok inon jadi las ma rohangku molo saut do ho gabe imbangku”, “Olo” ninna Leang Nagurasta Dapot ari na nihatiha ni Maria Rudang Bako dohot Suri Raja asa dijou angka haha-anggi dohot angka raja na laho mamasu-masu parsaripeon nasida. Saut ma tutu dipasu-pasu raja. Tung mansai las do roha ni nasida natolu jala satahi saoloan, ndang tanda namarimbang, rampak mangan rap manghatahatai jonok di partonunan ni Maria Rudang Bako. Sai didok do disi:

Balintang ma pagabe tumundalhaon sitadoan,

Arinta nama gabe molo sai tong-tong satahi saoloan.

e. Sorang anak buhabaju ni Leang Nagurasta,

Toho ma tutu dapot di arina hot di bulanna dohot taonna manggora ma pamuro, denggan ma pamatang ni si Leang Nagurasta; las situtu ma roha ni Maria Rudang Bako dohot Suri Raja. Dung dapot di arina jala hot di bulanna sorang ma sada anak baoa sian Leang Nagurasta, dibahen ma goarna si Bulan. Jala laos ima panjouonna ganup ari Di bindu-bindu namangihut patorangon do taringot si Bulan, nagabe margoar Tuan ima Tuan Juara Bulan jala goar tulut manang namarsejarah.

Naburju do Suri Raja dohot tunggane boruna nadua i, sai dos do dibahen di sude ulaon harumatanggaon tu duansa, tamba las ma roha ni Maria Rudang Bako ai nunga jumpang napinagido ni rohana dohot tondina ai nunga tung martuahon imbang ibana. Ia si Bulan nauli do rupana jala jolma natoman jala nabisuk sai dipadidang-didang nasida natolu do on atik pe nungga balga pamatangna.

Dungi muse dapot ma diarina hot ma dibulanna rap manggora ma ma pamuro, gabe-gabean ma Maria Rudang Bako dohot Leang Nagurasta laos sorang ma sada baoa sian bortian ni Maria Rudang Bako laos dibahen ma goarna Nahoda dohot sada boru sian bortian ni Leang Nagurasta jala dibahen ma goarna Marhite Ombun…..Lam digohi las ni roha dohot holong ma nasida dohot holong ma nasida ala nunga lam martamba-tamba las ni rohana. Jadi dihatihai pungu ma nasida gabe onom halak ima ianakhonna dua baoa, sada boru jala ina namanubuhon dua jala sada ama parsinuan.

3.PESTA NI SURI RAJA HUHUT PARBORHAT NI SI LEANG NAGURAASTA TU BULAN.

a. Pesta hagabeon ni Suri Raja.

Di las ni roha namarlompit ganda tubu ma di roha ni Suri Raja dohot Maria Rudang Bako dohot Leang Nagurasta dung hira boi marmahan-mahan Nahoda dohot Marhite Ombun asa marpesta. Jadi dapot ma di tingkina di ari naung binuhuLeang Nagurastaa dipapungu ma haha-anggi dohot boru dohot hula-hula dohot angka raja, dipasaut ma marpesta, margondang dohot namamalu ogung sabangunan laho manghalashon naung maranak marboru Ompu Suri Raja.

Manortor ma si Leang Nagurasta tandi sian sude hinaulina nang panortorna.

Songon garaga, songon garugu. Lobi sian songon nasada, hira nasiapulu

hinauli dohot hinamalona na manortor inon, ia tusi mangalenggang, laos tusi ma humusor simalolong ni natorop inon. Sai songon nahumuntur do sude ojahan ni natorop i molo marinjak si Leang Nagurasta. Jadi roma angka raja dijou ma Suri Raja, dipangido ma asa dilehon pahean habong-habong ni Leang Nagurasta naung lobi piga-piga taon lelengna ditabunihon asa diabithon. “Ra molo dipangke lam uli ma jala ndang tarhatahon be hinaulina”, ninna angka raja inon.

Dipaboa Suri Raja ma i tu si Leang Nagurasta, pintor tangis ma huhut didokhon, molo hupangke bajungki ingkon do marsirang hita, alai sai dijujui Suri Raja dohot raja natorop ima, ala ndang masuk dirohana be aha nanidok ni Leang Nagurasta. Binahen pe tire-tire marlampis di ginjang angka tingkar, asa unang boi habang jala tinutup angka pintu ninna angka raja. Ala marningot Suri Raja dipandohan namandok:

Baris-baris ni gaja di rura pangaloan, molo marsuru raja ingkon do oloan. Molo nioloan sai tubu ma pangomoan, jala molo so nioloan tubu ma hamagoan.

Jadi saut ma tutu dipangke si Leang Nagurasta jala huhut tumatangis; dijou ma angka anak nasida nadua i rap dohot Nahoda dohot Maria Rudang Bako sai diummai ma. Ditonahon ma tu Maria Rudang Bako dohot tu Suri Raja asa diparmudu-mudu jala diajari jala unang marasing-asing dibahen ianakhonna nanaeng tinggalhononna i. Tung leleng do marungkil, ala di roha ni nang Suri Raja ndang toho i, ai nunga sude pintu dohot lobang ditutupi, jala nunga pola dibahen pitu lampis tire sian ginjang.

Dipinta ma gondangna piga-piga ngombas, jala sude antong tarhatotong ala ni uli dohot tortor ni si Leang Nagurasta na tung mansai uli dibereng natorop dohot angka raja, lam leleng dipanotnoti, lam marsinondang. Jadi dijou ma Suri Raja dohot anakhonna dohot Maria Rudang Bako, dilehon ma poda tu anakhonna dohot boruna asa ingkon pantun alana:

Pantun hangoluan tois hamagoan

Tona tu Suri Raja, Maria Rudang Bako ingkon hot etongonna anakhonna i songon na sian siubeonna.

b. Leang Nagurasta borhat maninggalhon Suri Raja.

Jadi dipinta ma gondang parsirangan: “ Amang pardoal pargonsi, parindahan nasuksuk parlompan natabo, naginokhon manogot, najinou botari, amang namalo, nang pe sonidok nunga diboto ho, bahen damang ma jolo gondang parsirangan i tu angka nahuhaholongi on”. Songon ima didok huhut maraburan iluna durus songon udan, jala laos diummai ma sude anakna dohot boruna, rap manortor ma nasida sude, alai laos tompu ma di naso panagaman humutur sude angka ojahan i laos maribak angka tire-tire na di ginjang i huhut tarbuka ma bungkulan, habang ma si Leang Nagurasta tu ginjang laho mandapothon Mulajadi Nanbolon amana i. Haruar ma Suri Raja tu alaman sai maos ma ibana maringkat tusan tuson laho manailihon tu ginjang, alai dung pe ndang tarida be, mangangguk ma ibana, suang songon i anak dohot boruna rap dohot Maria Rudang Bako.

Jadi tung marsak do roha ni Suri Raja jala manolsoli di rohana, nang angka raja pe manolsoli do dipangidoanna:

Tinallik bulung sihupi pinarsaong bulung sihala, 

Unang sumolsol dipudi ndada sipaingot na soada…

4. PANGOLION NI SURI RAJA TU BORU MANURUNG

a. Nipi ni Suri Raja di Dolok Pusuk Buhit.

Suri Raja sai marsak do nang pe dipodai donganna raja jala sai tong do didongani arsak ibana. Di nasadari didokhon ma tu Maria Rudang Bako asa laho ibana mangalului parbinoto naboi mambahen asa mulak si Leang Nagurasta, laos dioloi Maria Rudang Bako do pangidoanna inon. Parjolo laho do ibana tu Dolok Pusuk Buhit donokhon ambar i, aut boha ro tusi maridi si Leang Nagurasta songon nauju i. Alani loja ni pamatangna dohot pikiranna, tarpodom ma ibana di si laos marnipi ma ibana.

[Adong deba sian natuatua najolo mandok ndang marnipi Suri Raja tung kejadian sasintongna do barita ni tangga na tuginjang i. Jadi laho ma roha godang do angka na tarjadi najolo, naso boi tarjalo pingkiran alai boi tarjadi, umpamana songon barita ni Ompu Pallagat….

Jala pala di jaman modern onpe godang do angka namasa, umpamana tarsongon harimo jadi-jadian, angka penjelmaan ni jolma naboi mamereng tu luat nadao (halak na di Indonesia mamereng halak na di Amerika). Tarsongon si pangalimunon, ai mamolus sian jolo niba, alai lintun ndang boi dibereng jolma].

Dibege ma soara songon on: “O amang Suri Raja boasa ma tung marsak ho amang, ai ho sandiri do mambahen ho marsak”. Dung i tarbereng ibana ma adong sada tangga songon na marsinondang jong-jong sian tano i sahat ro di bulan. Jala didokhon soara ima na di bulan do si Leang Nagurasta maringanan, Ai ndang diloas Mulajadi Nabolon ibana rap dohot nasida di ingananna hian. Ai ala tumatangis do ibana ndang adong inganan asi ma roha ni Mulajadi Nabolon amana i laos didokma: “Nunga bau sidomdomulu, bau manusia ho, ba tu bulan ma ho laho, laos sian i ma ho mamereng-mereng pinomparmu” ninna. Mambege i lam tamba ma arsak ni Suri Raja ala ndang boi naek tangga ibana ala songon piso do tajom ni anak tangga i jadi tumatangis ma ibana.

  a1. Marpadan dohot ulok balanga

Dungi gabe tarjolma ma namarsoara i songon ulok Balanga nabolon didokma: “Unang sai tumatangis ho, anggo tajom ni tangga i husasa pe asa boi dalananmu, alai marpadan ma hita naso jadi bunuon ni pinomparmu angka pinomparhu”, ninna. Laos ido dipodahon natua-tua najolo tu pinompar ni Suri Raja na so jadi mangganggu manang mamusa, manang mamatehon Ulok Balanga sahat tu sadari on. Laos marsioloan ma nasida jadi disasa ulok balanga inon ma anak ni tangga i sahat tu ginjang gabe boi dalanan ni Suri Raja alana ndang tajom be anak ni tangga i, laos nangkok ma Suri Raja tu punsu ni tangga i, hape adong dope holang-holang ni tangga i tu bulan alana ndang sahat tangga i tu bulan.

  a2.Tona ni Leang Nagurasta.

Tarbege Suri Raja ma soara ni Leang Nagurasta mandok: “Ale amang Suri Raja mulak ma damang ai nunga dimuruhi damang Mulajadi Nabolon ahu, jala ingkon di bulan on nama ahu maringanan, asa boi manatap-natap pomparanta i ahu. Alai tonahon ma tu pomparan ni borunta Marhite Ombun, asa molo disoro angkalau bulan on (gerhana bulan mai dihata nuaengon), asa pintor digorahon pamoruonta ima hata gora-gora “Paulak Bulan I Angkalau!”, jala dipalu ma angka gondang, odap-odap, jala martabar-tabar (digartuhi toru bara ni jabu dohot andalu) huhut manggora “Palua Bulan i Angkalau!”. Mambege i holan namarsak nama Suri Raja huhut tumatangis alai ndang adong be gunana. Jala sai dielek (disosoi) si Leang Nagurasta ma asa mulak jala unang mandele Suri Raja Jadi dioloi Suri Raja ma mulak huhut pasahathon tona i tu pomparan ni boruna Marhite Ombun. Jadi tarpuho ma ibana jala mulak pasahat tona na di nipina i, ima tona ni si Leang Nagurasta.

b. Suri Raja borhat tu Habinsaran Uluan.

Dipangido ma tu Maria Rudang Bako asa tong laho ibana mangalului namalo ima “Siboto uti-utian dohot boto-botoan (uning-uningan) panjaha di bibir, parpustaha di tolonan ima nidok na nuaeng on angka parhapistaran (professor). Dipaborhat Maria Rudang Bako ma Suri Raja borhat ma ibana mangoris topi tao, pingir-pinggir ni dolok, di ganup luat naadong di si parbinoto sai manungkun ma manang na boi do mulak tu ibana Leang Nagusta, alai sude mandok ndang boi be mulak ai nunga ditontuhon Mulajadi Nabolon ingkon di Bulan nama inganan ni Leang Nagurasta jala sintong do boa-boa di nipina i. Songoni ma Suri Raja gabe sahat ma ibana tu Luat Habinsaran Uluan, dipatulus ma rohana tu boru ni raja Manurung; saut ma tutu boru Manurung patoluhon nialapna, sian on ma sorang Pande dohot Altong. Mulak do Suri Raja tu bona pasogit gabe maringanan ma di tano Pangururan. Tuan Nahoda, Pande, si Altong, Boru Marhite Ombun ai nunga laho Tuan Juara Bulan mangalului amana dipaborhat Maria Rudang Bako.

5. HABOBORHAT NI TUAN JUARA BULAN MANGALULUI NATORASNA SURI RAJA.

a. Dipaborhat Tuan Juara Bulan mangalului Suri Raja.

Nunga tung malungun Maria Rudang Bako rap dohot anakhonna paima-ima hamumulak ni Suri Raja: “Ia le anaha borhat ma ho mangoris-oris topi Tao Toba, paihut-ihut topi ni dolok i mangalului amangmu, ai hubereng hatiha tondung di parhalaan mangolu dope ibana” ninna Maria Rudang Bako. Dioloi Tuan Juara Bulan ma tutu, dipaborhat ma ibana denggan dilehon do boanonna ultop, piso dohot tintin simanjadi-jadi songon alat naboi parohon bohalna di dalan, jala diajarhon do angka parbinotoan dohot hamaloan pangatihaon lan dohot parbinotoan Pangubation (hadatuon).

Borhat ma Tuan Juara Bulan mangoris-oris topi tao huhut paihut-ihut topi ni dolok. Jala disude angka luat dohot huta binolusna sai maradian do ibana manungkun mamalo, manang na didia amana Suri Raja. Sude mandokhon mangolu dope Suri Raja, jala nunga diboto ibana sarupa boa-boa ni tondungna. Laos pamolusan (pardalanan) ni Suri Raja do diihuthon Tuan Juara Bulan jala adong do sinungkunni amana najolo tepat muse disungkun Tuan Juara Bulan.

b. Goar Juara naparjolo tu Tuan Juara Bulan.

Jadi sahat ma ibana tu Ransang Bosi huta najonok tu Muara, disi pajumpa ma ibana dohot lobuan ni angka naboi (parhata oloan) angka raja natuk, marlobuan marjuji, sai somal molo dung sidung gotilon songon daon lalap marpungu huhut marjuji. Digora ma Tuan Juara Bulan: “Ai ise do ho, naro tuluat on nalaho martandang marjuji do rap dohot hami?” Ninna napungu i. “Ia ahu anak ni Suri Raja do ahu jala ulaonku mangalului damang do asa mulak tu Pangururan, ia goarhu si Bulan do, jadi molo boi adong namalo di luat on asa husungkun jolo manang na didia damang parsinuanhu?” Ninna Tuan Juara Bulan. “ Nauli mai molo dipaboa hami namalo i oloanmu ma rap marjuji hita?” Ninna natorop i. “Boi mai jolo asungkun ma namalo i”. ninna Tuan Juara Bulan. Jadi dung disungkun namalo dipaboa ma naung mambuat boru do amana Suri Raja di Habinsaran Uluan.

”Jadi hori do ihot ni doton, janji do ingkon siingoton jala siuluhonon, jadi nuaeng pe ro ma ho namarjujion ma taula”, ninna angka raja namarjuji na disi, ai disangkap nasida boi oto-otoanna ibana. Sai manjua do nian ibana alai nngnga sanga diseat hata ibana. Dung dialusi marjuji i sai monang ma ibana nang pe manang boha diangkali ibana, leleng do ibana di luat i jadi ala ndang hea talu didokma ibana: “Botul do ibana juara ba”, jadi dijou ma ibana Tuan Juara Bulan. Jadi mulai sintap ni ima ibana dijou goarna Tuan Juara Bulan ala sude na di luat i nasa natardok juara ndang boi manaluhon ibana. Di tingki ima mulak Suri Raja mulak tu hutana rap dohot nialapna gabe maringanan ma dohot Tuan Nahoda Raja dohot Pande, Altong Nabegu di Pangururan, alana Tuan Juara Bulan tong dope dipardalanan.

Sude do halak marlomo ni roha mamereng Tuan Juara Bulan ala sai diurupi ibana do jolma na gale, sai dilehon ibana do hamonangan na i tu angka napatut siurupan, jala sai dipodai do asa unang marjuji. Ai sai olo do ibana manggalang. “Jadi olo ahu marjuji ala ni paksaan ni dongan raja do” ninna, lambok do hatana begeon ndang adong na risi, uli rupana.

c. Tuan Juara Bulan diarahon Tuan Ringo tu Paranginan.

Dung leleng di luat i roma sahalak sian donganna marjuji namargoar Tuan Ringo, manogihon Tuan Juara Bulan tu huta ni tulang ni Tuan Ringo di tano paranginan Sihonongon laos didokhon ma: “Asa urupi majolo datulang i ai nunga dihubu musuna hutana (terkepung hutana i dihaliangi musu)”. Dioloi Tuan Juara Bulan ma dung jolo dihatiha ari si monang-monang do, pos ma roha ni Tuan Ringo ai parbinoto do Tuan Juara Bulan naso jadi talu. Sahat ma nasida dung dilaosi tano Muara, borngin do nasida sahat tu hutai asa unang tarbereng musu, jala marhite-hite bulu do dalanna tu huta. Dituk-tuk ma jabu ni Raja Siburian Sihonongon ima Ompu Pangalemlem huhut didok: ”Ahu do on tulang Tuan Ringo dohot Tuan Juara Bulan buka ma pintu i, di tiur ni ari pe talele musu i”. Dung dipatandahon Tuan Juara Bulan pos ma roha ni Ompu Pangalemlem Siburian Sihonongon, na hurang hatop di rohana tiur ni ari.

Dung tiur ari jongjong ma Tuan Juara Bulan di atas parik ni huta i dibereng ma tutu nunga torop manghubu huta i. Disuru Tuan Juara Bulan ma na di hutai marsurak-surak gogo huhut maringkat manopi-nopi parik ni huta i sian bagas asa hira na godang pangisi (parangan) ni huta i, jala laos mambege i musui hehe ma ulubalang ni musu i jadi pintor diultop Tuan Juara Bulan ma hona pas dipardompahanna jala pintor peak do ai nunga diisi hian anak ni ultop i dohot rasom (racun). Marnida namasa i huhut mambege surak-surak nagogo i laos mabiar huhut maporus ma sudena musu namanghubu huta i dilele Tuan Juara Bulan. Ai najolo molo dung mate ulubalangna tingki marporang nunga dianggap natalu sude paranganna, gabe laos songon ursa na binuru ma torus maporus.

d. Goar juara paduahon tu Tuan Juara Bulan.

Mulak ma tu huta Tuan Juara Bulan, gabe ro ma angka raja dipio Ompu Pangalemlem huhut mangakui botul do ibana juara di partontangan ulubalang nagogo, ala holan ibana do mambuhar musu nasongon i toropna, Sebab dialah:

Juara dungdang do ibana juara pane

Naso jadi mabugang di partontangan jala naso jadi mate ala ni podang.

“Ima tutu Rajanami sahat ma hujangkon goar natarpasu-pasu goar Juara Bulan i hujalo ma dibagasan las ni roha”. Nina Tuan Juara Bulan.

Asa tano lobu tua ma paripar-ipar onan ganjang,

Horas ma hita saur matua sai dilehon Debata ma umur na gumanjang,….

Manungkun ma Ompu Pangalemlem Siburian Sihonong-n, aha ma dipangido roha ni Tuan Juara Bulan, manang aha silehonon nasida songon balos ni nauili binahen ni Tuan Juara Bulan tu nasida, ai nunga monang nasida maralohon musu. “Ndang pola rajanami, ai ulaonhu nalaho mangalului damang Suri Raja do”, ninna Tuan Juara Bulan. “Ianggo i do adong do namalo sungkunonta ninna Ompu Pangalemlem. Jadi dialapi ma parbinoto, marboa-boa ma dung disungkun. “Mangolu do jala nunga mulak tu hutana rap dohot pardijabuna”, ninna parbinoto inon. Tutu dihatiha (tondung ni Tuan Juara Bulan) pe songon i do jadi pos ma roha ni Tuan Juara Bulan.

6. HASASAUT NI TUAN JUARA BULAN TU SI BORU HASUBUTAN.

a. Tuan Juara Bulan manodo si Boru Hasubutan

Marsangkap do Ompu Pangalemlem ingkon helana Tuan Juara Bulan, laos dijujui ma raja asa marhahotan Tuan Juara Bulan mangalap boru di si ala sude angka raja manjujui, gabe marhusor ma rohana asa mangoli jala disi tinggal, ala nunga pos rohana mulak amangna tu hutana di tano Pangururan, Jadi didok ma: “Rajanami ba olo pe ahu nanidokmunai mangalap boru, alai adong pangidoanhu sada syarat, pillit hamu ma pitu borumuna na di son asa sian napitu i hupillit sahalak na boi ina haposan di jabu nang dibalian ni huta”, ninna. Dua ma boru ni Ompu Pangalemlem jala lima ma boru ni angka haha-anggina tarpillit, ai sude do naeng olo ai nauli rupa ni Tuan Juara Bulan on. Jadi disuru Tuan Juara Bulan ma anak boru na pitu i laho mangalaosi sada batang aek (sunge) na met-met, onom sian nasida disintak do abitna, dipataridahon nasida do bandanna asa unang tonu paheanna, alai shalak sian nasida dibolus do aek i ndang disintak abitna tu ginjang, ai diboto ibana do ila dohot hapantunon, laos sahalak i ma dipillit Tuan Juara Bulan dongan sinondukna atik pe na onom nari angka nauli rupana. Ai diingot do namandok:

Sibigo ambaroba rara huling-hulingna, 

nauli do na roa asal tama (pantun) pangalahona.

Jadi godang do longang anggo namarnida ai tung apala napinillit na sian napitu i do natarummoru anggo diuli ni rupa. Ianggo di Tuan Juara Bulan apala na umporlu ala parbinoto si ida roha do ibana, ai panjaha-jaha di bibir do ibana, parpustaha ditolonan, jadi laos tepat situtu do boru siampudan ni Ompu Pangalemlem do pinillitna i, ima namargoar si Boru Hasubutan. 

Dipasu-pasu raja ma nasida gabe hot ripe, jala dilehon do di nasida hauma pauseang (sahat tu ari on adong dope hauma inon). Dibahen do nang jabuna Alana sai ditiopi do tinggal di Paranginan, ala sai songon na adong gorak di roha ni Ompu Pangalemlem, sai naeng ro do pe musuna; nang pe hira dijamin Tuan Juara Bulan ndang na laho ro be musu alai sasintongna ala na sai holong situtu do rohana di Tuan Juara Bulan.

b. Pinompar ni Tuan Juara Bulan.

Dapot ma di ari nauli di bulan na hot tubu ma buha baju ima Ompu Rambe Natorop. Leleng do Tuan Juara Bulan di lambung ni simatuana, ia jolo dibasa-basahon Mulajadi Nabolon do tolu anak baoa dohot sada boru (manurut barita i tu marga Lumban Toruan do marhamulian). Ia goar ni anak paidua ima Ompu Guru jala anak paitolu ima Ompu Raja Isoli jala adong do mandok Jaisoli….

7. HAMUMULAK NI TUAN JUARA BULAN TU HUTA NAMORA

a. Mulak ma Tuan Juara Bulan tu Bona Pasogit.

Dung magodang be ianakhonna na tolu i dohot boruna, pur ma alogo sar ma barita naung tibu do hape Suri Raja dohot tunggane boru Manurung rap dohot anakhonna ima Pande dohot si Altong mulak tu Pangururan jala nunga dimpos saluhutna, mangido pasu-pasu ma Tuan Juara Bulan tu hula-hulana asa dipasu-pasu haboborhatna tu Pangururan. Alai tung leleng do pe tingkina asa dioloi Ompu Pangalemlem dohot angka raja namarholong ni roha pangidoanna i. Apala marsingos-ngos diroha ni Tuan Juara Bulan ala nunga marbagi arta warisan be di Pangururan nasida Tuan Nahoda Raja, Pande dohot Altong, jala nunga dibagi tolu bagian ni Tuan Juara Bulan ala nunga dianggap naung mago ibana. Alai Tuan Nahoda Raja sai didokhon do: “Jolo ro ma ibana, Alana anggo marnida parhalaanhu dohot gorak di ahu mangolu do ibana”, alai alus ni angina na dua on: “Marnida di si ma i molo ro ba talehon pe bagianna”.

Di tingki parborhat ni Tuan Juara Bulan sian Paranginan, tinggal do ianggo boruna na sasada i dijolo ni Ompungna, jala diboan ma anakna natolu i dohot si Boru Hasubutan.

b. Tuan Juara Bulan maringanan di Hutanamora.

Mardalan ma nasida sian Paranginan tu Muara, jala sian i ma torus tu Huta Namora, ndang pintor tu Pangururan. Di Huta namora ma jolo Ompu Tuan Juara Bulan raphon anakhonna. Marsungkun ma nasida dohot si Boru Hasubutan laho manontuhon ari asa laho mandapothon Tuan Nahoda Raja manaringoti pambagianna sian arta ni Suri Raja amana i. Molo nitaksir sian on, nunga jumolo marujung Suri Raja umbahen tu Tuan Nahoda Raja naeng topoton ni Tuan Juara Bulan….

8. PARJUMPANGAN NI TUAN JUARA BULAN DOHOT TUAN NAHODA RAJA

a. Tuan Juara Bulan mandapothon Tuan Nahoda Raja

Dipaborhat si Boru Hasubutan ma Tuan Juara Bulan laho mandapothon hahana nasongon singkat ni ama di nasida. Laho ma ibana jala tingkos do dapotsa di tonga ni jabuna. Mansai las situtu do rohana na pajumpai, masihaolan jala pola robe angka iluna ai taringot ma nasida tingki dakdanak dohot napinaborhat ni Maria Rudang Bako laho mangalului amana, lungun ma rohana ai so dapotsa be Suri Raja, Maria Rudang Bako na sai tong marmudu-mudu nasida tingki met-met. Jadi masisungkunan barita ma nasida jala dipaboa Tuan Juara Bulan ma naung mulak ibana, jala nunga marhasohotan jala nunga opat dakdanak ima tolu anak baoa dohot sada boru na tading do dijolo ni Ompungna (simatuana). Tung leleng do nasida mamaritahon taringot pangalamanna dung mulak amang nasida Suri Raja sahat tu pangalamanna dung mulak amang nasida Suri Raja sahat tu naung sai digogo angka tubu ni inanta boru Manurung ingkon bagion ma arta tininggalhon ni ama nasida.

“Hudok do nian jolo ro langkam, ndang olo nasida, jala didok marnida disi ma i molo ro ninna nasida do”, ima didokhon Tuan nahoda Raja. “Ima da, laos mardomu tusi do harorongku mandapothon ho tu son asa lehon hamu ma aturan na di ahu, ima angka golat parhombanon, golat partuanon, dohot golat upa hoda dohot lan na so hugoari dope”, ninna Tuan Juara Bulan. “Songon on ma i, sogot ma tahatai alana ingkon jouon do angginta nadua nari ala di nasida do deba bagianmu, ai anggo na di ahu sapartolu do, jala pos ma roham lehonongku do i. parmisi sian Tuan Nahoda Raja. Disi sahat ibana tu Huta Namora nunga borngin. “Boha do hasilna”, ninna si Boru Hasubutan huhut nunga mananginangi be anakna natolu i, laho roha nasida adong angka parbadaan. Dialusi ma: “Nadenggan do alus ni Tuan Nahoda Raja ala naung sanga dibagi tolu jadi jolo marpungu ma hita na opat, asa dipaulak be angka aturan na di hita, anggo Tuan Nahoda Raja sintong do ibana nunga dihatindangkon paulakonna do anggo bagianta naung sanga di ibana. Jala anggo na sangsi ibana na dua nari nama, jadi marsogot ma hataon i dung jolo ro halak on nadua.

b. Parjumpangan nasida na opat di bagas ni Tuan Nahoda Raja.

Dung dijou Pande dohot Altong jala disi diboto naung mulak Tuan Juara Bulan, pintor songon namaralo do rohana be jala tarida do dipertemuan i ndang apala tarida holong. namarsihaholongan, ndang adong sungkun barita. Jadi manghatai ma Tuan Nahoda Raja: “Hamu angka anggiku hita namarsaama tangkas songon naung binerengmuna nunga ro dison hahamuna Tuan Juara Bulan, jala nunga adong tolu anak baoa dohot sada anak borua, jala di Huta Namora do diingani. Mauliatema di Mulajadi Nabolon natasangkap ndang adong be harapan mulak, tama ma marlas ni roha hita. Jadi ala naung tabagi tolu arta ni amanta, nuaeng pe laos pinangido ma tu hita asa tapaulak be ma parbagianan ni ibana naung tatiop be. Bahen hamu ma alus sian hamu”.

Dungi dialusi anggina na dua ima, ia Pande mandok: “Anggo ahu tegas do dohonongku naung hujalo jambarhu si bagitolu, jambarna na di ho, ba i ma paulak” ninna tu Tuan Nahoda Raja. Jala si Altong mandok: “Ba labu ahu ma, ba dilului ma na di ibana, jala tung so hupadais hupaulak tu ibana, na di ho ima lehon bagianna i, molo lomo roham”, ninna tu Tuan Nahoda Raja. Jadi didok Tuan Nahoda Raja ma : ”Ba ima ba, nunga dibege ho hatai bahen ma alusmu”, ninna.

Roma Tuan Juara Bulan dialusi ma: “Ima tutu gabe ma jala horas, molo so olo be hamuna paulakhon jambarhu ima angka golat warisan sian amanta, ba ise ma hamu na olo paulakhon ba tontu ima namarningot janjimuna di tingki namarbagi i”. Dungi pintor hira naso adong be pardomuan ni hata.

c. Padan ni Tuan Nahoda Raja dohot Tuan Juara Bulan.

Didokhon Tuan nahoda Raja ma: “Nuaeng pe ingotonhu do hatanta nantoari, ia golat parhombanan mulak ma tu ho na di ahu sapartolu ni bagianmu hian, jala golat upa hoda songon ima tong, ia golat hatuanan on ma tabahen sada parjanjian di hita si sada Tuan ma hita, ahu ma Tuan Nahoda Raja, ho ma Tuan Juara Bulan, molo tung adong ulaon di ahu Tuan Juara Bulan ma panamoli (parsinabul) suang songon i ma sabalikna molo di Tuan Juara Bulan ulaon, Tuan Nahoda Raja ma parsinabul”, ninna. Ima tutu:

Habang ma ambaroba paihut-ihut rura. 

Padan naung nidok mi sai unang muba jala unang mose.

Onma parjanjian (padan) ni Tuan Nahoda Raja dohot Tuan Juara Bulan, jala manang ise na manungkun Simbolon dia do hamuna Nahoda Raja do manang Juara Bulan dialusi ma Simbolon Tuan. Alai molo sai dirigati (dipatangkas) muse baru pe dialusi Simbolon Tuan Nahoda Raja manang Simbolon Tuan Juara Bulan, on ma mulana goar Tuan dibahen tu Nahoda Raja dohot Juara Bulan. Jadi pintor laho ma Pande dohot si Altong gabe holan Tuan Juara Bulan dohot Tuan Nahoda Raja nama marpadan, jala unang sai disungguli be jambar na di nasida i ala satahi nama nasida marjanji tung naso paulakhon bagian manang jambar ni Tuan Juara Bulan.

d. Upa Harajaon ni Tuan Juara Bulan.

Dinamulak Tuan Juara Bulan botarina i tu Huta Namora, marningot ma ibana adong dope naso tarbagi ima golat harajaon; ndang tarpodom ibana, nahurang hatop buha siang ari asa ditopot donganna sapartuanon. Ima tutu dung buha-buha ijuk ari dapotsa ma Tuan Nahoda Raja ditonga ni jabuna pintor las do rohana huhut mengkel-engkel didokma: “Oe Tuan Juara Bulan adong dope nanidokmu?” ninna, dungi dialusi Tuan Juara Bulan ma: “Adong dope nanidokmu?” ninna dungi dialusi Tuan Juara Bulan ma: “Adong dope Tuan Nahoda Raja!”, ninna. “Ahama i da, jolo pahundul ma angka natingkos i ndang namago i manang muba; ai boha tahe andigan do suruonmu anakta i laho mangihuthon warisan nasahat tu ho na sian bagianmu na di ahu alana daba molo di habinsaran bagianhu di hasundutan ma di ho”, ninna Tuan Nahoda Raja. Di Bindu parserahan ni anak na tolu i tangkas do botonta ise na laho tu Pangururan. Dungi dialusi Tuan Juara Bulan ma: “Nauli ma i hahang Tuan Nahoda Raja jolo tiur ma jolo sude, saksak sian losung, ias dibahen anduri, denggan lompaon, busur ni hasangapon gabe mantap gogo naimbaru di hahipason.

Pauk-pauk hudali, pauk-pauk tarugi.

Natinggal tahatai denggan ma tapauli.

Dungi ninna Tuan Juara Bulan ma: “Ima da Tuan Nahoda Raja ai adong dope natinggal naso tahatai, ima golat harajaon, ba alani on do ndang tarpodom ahu umbahen na tibu ahu ro mandapothon Tuan Nahoda Raja”. Dialusi Tuan Nahoda Raja ma: “Di ape ninmu Tuan Juara Bulan, anggo hasintongan i ingkon do ulahononta nadua, pos ma roham. Alai unang sai tolu hali nihataan, pingkiri ma jolo manang na adong dope; molo na holan ondo ba tong ma da ingkon jouon angginta nadua, ai ndang binoto aut naadong parhusor ni rohana”. “Nauli mai, ba tajou ma tutu nasida na dua (Pande dohot Altong), ninna Tuan Juara Bulan.

Ro do nasida jala marpungu ma nasida na opat, jala sompong do ro alus nasida dung hundul be, pintor rodo hata dung pajumpa bohi: “Aha dope sidohononna muse? Ai nunga be sae nantoari, aha dope? ninna nasida. Dungi ro ma tutu Tuan Nahoda Raja: “ Adong dope nian, ai boha tong nama songon alus mu sinantoari alusmu, jala ndang muba ndang mose be i? Songonon do ahu pe lupa do nantoari, tuani ma ro Tuan Juara Bulan ala diingot do ima golat upa harajaon, boha nasian hamu, anggo sian ahu pasahatongku do tu ibana”, ninna Tuan Nahoda Raja tu Pande dohot tu Altong. Laos sompong muse ma alus nasida nadua, pintor di dokhon ma: “Ai holan namanihai jambar do ho, bahenon ma goarmu Tiha Raja, saean naeng on” ninna laos ditinggalhon punguan i. sai holan ima gora-gora nasida tu Tuan Nahoda Raja dohot tu Tuan Juara Bulan. Onma mula ni goar namanubui tu Tuan Juara Bulan. Jala andorang so ro Tuan Juara Bulan sai pintor dibagi tolu do angka jambar, sai dianggap Pande ma ibana nomor dua.

Dung dilehon Tuan Nahoda Raja warisan golat harajaon mulak ma denggan Tuan Juara Bulan tu Huta Namora.

c. Saotik sipingkiran taringot tu janji.

Habang ambaroba paihut-ihut rura. 

Padan naung nidok ndang jadi muba-uba.

Jadi dijaman nuaeng on nunga godang Naso mangulahon padan i, ala adong do pihak patoluhon namanurat naso horongna gabe dijalo informasi nahurang tepat, ala so adong tarsurat manang tona, gabe laos ima diihuthon songon namasa di hita, na adong berpegangan buku naung hea dicetak marga naasing. Jadi gabe ro ma hata:

Mumpat taluktuk sega angka gadu-gadu. 

Nunga muba uhum ai nunga ro peraturan naimbaru.

Sasintongna gabe godang nama mangihuthon songon namasa nuaeng on, ala ndang jalur tona dohot padan ni ompu najolo be diihuthon di piga-piga inganan. Alai ndang tiala iba alana ndang turun-temurun hata i di bege, holan sian na jinaha di buku do, ndang mabiar be di hata namandok:

Dengke ni sabulan tu tonggina tutabona

Manang ise siose padan turipurna tumagona.

Alai anggo tona ni Ompu Tuan Juara Bulan songon on do:

Tanggo urat ni bulu tanggoan urat ni padang

Tung tango pe mardongan tubu, tumanggo an do nirahut ni padan.

Menurut catanan sian Ompu Rumondang dohot Aman Domma, laos sian on ma nisimpulhan: Ia si sada Padan (janji) ima si sada Tuan”, jala molo siingot padan songon on ma: 

“Molo Tuan Juara Bulan marulaon parsinabul ma Tuan Nahoda Raja jala 

molo Tuan Nahoda Raja marulaon ba parsinabul ma Tuan Juara Bulan”.

9. SEJARAH NI GOAR TUAN JUARA BULAN

a. Goar hasangapon Juara di Tuan Juara Bulan

Ia goar ni Ompu Tuan Juara Bulan sude do goar tulut manang bersyarat. Goar naparjolo tingki natinubuhon ni Ompu si Leang Nagurasta ibana dibahen Ompu Boru ma goarna ima si Bulan. Dinalaho ibana dung doli-doli mangalului amang na Suri Raja dung marguru ibana diangka parbinotoan dohot petunjuk na niajarhon ni Maria Rudang Bako dapotsa do goar Juara di luat Ransang Bosi, Muara sahat tu Paranginan nunga tung cukup bohal ni Tuan Juara Bulan on diguruhon gabe didok ma songon di hata Batak:

“Panjaha-jaha di bibir, 

parpustaha ditolonan”

Molo di jaman modern on didok ma i sarjana, jadi didia pe ibana sai mamunjung do hinaulina, haburjuonna dohot parbinotoanna. Roma angka raja diajak ma rap dohot Tuan Ringo marjuji songon daon-daon lalap ni ari, beha pe diangkali ibana sai tong lalap na monang. Leleng do di luat i ibana rap marjuji alai gabe mangaku ma sude na di luat i diresmihon ma ibana Juara, gabe sai dijouhon ma ibana Juara Bulan.

Di partontangan pe songon di masa ni porang ni Ompu Pangalemlem Siburian Sihonongon, tingki nabinoan ni Tuan Ringo mambuhar musu ni tulangna gabe dilehon do goarna Juara.

Porang silele musu na sotalu jala na so mabugang. Didokma:

Juara dungdang juara pane, dipartontangan na so Jadi Juara ma ibana di parjujian, juara nang di partontangan, 

juara muse marsinabul suang songon i juara di parbinotoan.

b. Goar hasangapon Tuan di Tuan Juara Bulan.

Ia goar Tuan dapotna do di tingki mulak mandapothon Tuan Nahoda Raja marbagi di golat upa hatuanon, marjanji ma nasida sisada Tuan ima Nahoda Raja gabe Tuan Nahoda Raja jala Juara Bulan gabe Tuan Juara Bulan. Parpudi sahali do dijalo ibana goar hatuanon rap dohot Tuan Nahoda Raja di padan manang di janji nasida. Asa molo disungkun halak marganta di pardalanan manang tingki marsitandaan alusna Simbolon Tuan, alai molo sai dipatangkas manungkun Tuan dia, ipe asa dipaboa tangkas Simbolon Tuan Nahoda Raja, manang Simbolon Tuan Juara Bulan. Ido umbahen na molo adong manungkun Simbolon dia do ho ninna, alusan ma Simbolon Tuan. Jadi ingkon dipatangkas do muse Tuan dia ma huroha ipe asa alusan Simbolon Tuan Juara Bulan manang Simbolon Tuan Nahoda raja.

10. PARSERAHAN NI ANAK NI TUAN JUARA BULAN.

Dung renta sude warisanna na pinaulak ni Tuan Nahoda Raja, nang pe sian nadua nari ndang dipaulak ima sian Pande dohot Altong, diatur ma angka anakhonna. Anak siangkangan ima Ompu Rambe Natorop ima natinggal di Pangururan mangihuthon warisan naung pinasahatna tu Ompu Tuan Juara Bulan jala tingkos do on mangihuthon naung pinatorang ni Ompu Rumondang sian pomparan ni Ompu Rambe Natorop.

Ia sipaidua Ompu Guru maringanan ma on di Siambalo laos dison do hapeahan ni tugu Tuan Juara Bulan si Boru Hasubutan saonari on.

Jala sipaitolu ima Ompu Jaisoli (Raja Isoli) maringanan ma on di Sijambur di dolok ni Siambalo. Angka barang pusaka laos disimpan pomparan ni Ompu on do di Sijambur ima: “Ultop, rangin, piso, patung” laos dipataridahon do di pesta tugu inon songon ultop sanga do di patortor, alai rangin ndang dipatortor be.

Jadi lam torop ma pomparan ni Ompu Tuan Juara Bulan ala dapotan pasu-pasu do tongtong songon ni dok ni umpama:

Bulung ni pangkat tu bulung ni hotang,

tudia pe mangalangka tusi ma rap dapotan.

Martahuak manuk di torumbara ni ruma, 

halak na pantun marama i do halak na martua.

11. POMPARAN NI OMPU NA MANGARANTO TU LUAR NI BONA PASOGIT

Pomparan ni Ompu Tuan Juara Bulan na laho do sebahagian tu luar ni Pangururan, Simbalo dohot Sijambur ala naung denggan manjalo pasu-pasu Ompu Tuan Juara Bulan sian hula-hulana songon:

Bintang narumiris, ombun nasumorop; anak pe diri jala boru pe antong mansai torop.

Jadi tarida ma tutu dihagabeon, hatoropon pinompar, jadi godang ma nalaho tu luat…..

Bulung na dao mangalului panjampalan nalomak, adong do gabe pangubati, adong do marsitano panombangan, adong do laho majajo, jala adong muse do mangulahon uning-uningan ni halak Batak, lan dope angka naasing tu liat Indonesia on songon na tarsurat namangihut on:

Goar (nama)

Sian Pomparan ni (dari Keturunan) Manombang tu (Merantau ke)

1. Ompu Tunggal Sohatian Ompu Rambe Natorop Simalungun

2. Ompu Mangalonggak Ompu Guru Ambarita

3. Ompu Jorgang Nabegu Raja Isoli Parlilitan, Tanah Karo

4. Ompu Jaleleng Ompu Guru Tigalingga, Simbolon, Parbuluan

5. Ompu Solobean Ompu Guru Ambarita, Simalungun

6. Raja Ompu Ujima Ompu Guru Ambarita, Simalungun

12. PANUTUP

Tarsongon i dope naboi sinurat hombar tu nahea diturituriohon ni amanta Sintua Mangaraja Torang Simbolon dohot adong deba hatorangan sian Ompu Rumondang Simbolon taringot padan ni Tuan Nahoda Raja dohot Tuan Juara Bulan. Marningot porlu ni pangantusion di paradaton dohot uhum songon napinungka ni ompunta parjolo, porlu do mambahen sada organisasi songon na somal saonari on, songon napapunguhon huhut mandorong hamajuaon di pomparan ni Ompu Tuan Juara Bulan asa tong boi ditiru hahajuaraon songon Ompunta najolo.

Songon pamungka ni organisasi dibahen do dison sada contoh ima di Lampiran: 1, mengenai mula ni punguan pomparan ni Tuan Juara Bulan na adong di Pematang Siantar (Sumatera Utara). 

Jala adong do sada salinan ni tarombo tulisan tangan naung hea disusun angka pomparan ni ompunta na tolu naparjolo inon songon na di Lampiran: 2, asa talengkapi jala tapadenggan nian. 

Asa sude ma hita melengkapi huhut padengganhon tarombo ni Ompu Tua Juara Bulan on. Asa rap ma hita mangaradoti huhut mangihuthon tona dohot adat-adat ni Ompunta naparjolo.

Horas jala gabe ma hita sude.

Pematang Siantar, Maret 1996

Namanghobasi,

Ompu Ibrahimsyah Simbolon.